2Ti 4 | PMA | STEP | Timoti, Iesu Kristo hemai hekistal hehi Asuv Houlu onen meatin vasi keil. Sakini, en meten Ahi ka meten Iesu Kristo koa houmon hakot min koakeil amoul ka koakeil umat, navit masel katuk vamukok:

2 Timothy 4

Pol Sel Kat Timoti Keke Hehuli Kat Selusien Onen Ahi

1 Timoti, Iesu Kristo hemai hekistal hehi Asuv Houlu onen meatin vasi keil. Sakini, en meten Ahi ka meten Iesu Kristo koa houmon hakot min koakeil amoul ka koakeil umat, navit masel katuk vamukok: 2 kiles kihitehiten more longlongien onen Ahi. En avong tetahos ka avong tatisa, kisak mesen keik veni. Koakeil amul en tisaen, kihit lat sakien tatisa one ka kiling keil en sise koa mal. Navong kovasel kat meatin keil en more hihiseien, kumon rendemien onom hetaveah. 3 Avong tai koa hemai, meatin keil iseseini avataengon more hihiseien ten anatinien. !Anatin! Keil usil envatien tateisav one, ka ilah ruain tiser keil houlu keke ilea isan hihiseien keil koa evati avataengoni. 4 Ihiles ran selusien ten anatinien ka ilong kat hihiseien keil koa usil tunien keil telamu koa rovitei anatin. 5 Ka keik, Timoti, kilei kat revi sakien keil onom lisenges. Kihatimal hekeih en mahien keil onom, kihitehiten more longlongien lises ka kum vasi tounah keil koa Ahi lingi mul en hem.

6 Nasel katuk mukok veni inau, vesesal moulien onak vavus vasuval sanien ekor tai onak va min Ahi; vesesal malokovein out netan. 7 Nasuval meatin tavaeen onen Asuv Iesu, navuhu keih. Ka en lohlohien ten demkatien orer, narmusehtei ka narokol keite teni ke. Nakur kat demkatien onak ka narmottei eni. 8 Sakini, en avong koanik, nakilea keke asuv Iesu ling kat uite ten lohlohien onen koakeil moulien one mal vasi venau. Anatin, en Avong ten Hakot, navong kei koa mal vasi heling hakot min meatin keil, hesan uite enek minau, ka min meatin vasi keil emun koa evati mok keke kei hekistal.

Selusien Sav Onen Pol

9 Timoti, kisak visi keke kovakalah kovamai kovales inau ekok. 10 Navisok kovamai veni Kresken va mum en provins ten out Kalesia, ka Taetas emun va mum en provins ten out Dalmesia. Ka Dimas, kei envat tounah ten out netan, lohosai ranau, va en meteimal ten out Tesalonaeka. 11 Luk enges ro ral minau. Sakini, kikur Mak hetal minuk, veni kei kilea hekataunau en umen keil onak suval mumoni mulamu. 12 Ka nasila Taetikas va en meteimal ten out Efeses. 13 Ka navong kimai, tahos kikur eisin omak ten anni koa nalingi mul en hen Karpas koa mul en out Troas. Ka kikur tus keil onak hetal min tisien emun keil onak.

14 Aleksanda, koa vi meatin koa mumon tounah keil en aean, kei purunau vareis. ^{▼▼4:14 Umen 19:33-34} Ka Ahi Asuv hesa kesi suk mini. 15 Kilei kat revi keik ven meatin enek, veni kei mul vuhu houlu ral min more longlongien koa rovitehiteni.

16 Navong akur nau nuvan kot avong mulamu, meatin tovuol valomal vaselus en usite onak. Keil vasi alohosai ranau, ka navis Ahi herleletei hetisa en keil veni. 17 Ka Asuv Iesu ro vesesal venau ka san keihoen minau. Kei sakinau navit revin more longlongien usil Asuv orer min koakeil arvitei Siu araengoni. Vesesal avaling hakot avit mamat, ka Ahi ring koe nau. 18 Ka Ahi heting koe nau ran tounah tisa keil vasi ka hekur revi nau nihina en meteimal houlu onen en out nesa. !Rehehati lat isen Ahi hehina nesa lises ka lisenges! !Anatin!

Selusien Ekor Onen Pol

19 Naviten 'more' min Prisila ka meatin onen, Akuila. 'More' mun min Onesiforas ka min koakeil aro en teim sen. 20 Erastas mules en out Korin, ka naling Toropimas en out Milaetas veni kei mesai. 21 Kisak visi kimai kikalah veni avong ten an tisa mul mai. Epulas, Pudens, Laenus ka Klodia, ral min tuer sav keil emun, aviten 'more' minuk.

22 Navisi keke Ahi heto venuk Timoti, ka more envatien onen hel ven kami vasi.